بەپێی نوێترین هەڵسەنگاندنی سیستەمی ڕیزبەندیی QS بۆ زانکۆکانی ئاسیا لە ساڵی ٢٠٢٦دا، ٤٨ زانکۆ لە ئێران لەنێو یەک هەزار و پێنج سەد و بیست و نۆ دامەزراوەی خوێندنی باڵای سەرکەوتووی ئەم کیشوەرەدا جێیان گرتووە.

لەم هەڵسەنگاندنەدا، زانکۆی کوردستان توانیی پلەی ٥٢٢ لە ئاستی ئاسیا و پلەی ١٣٩ لەنێو زانکۆکانی ناوچەی باشووری ئاسیادا بەدەست بهێنێت.
هەروەها، لە ئاستی وڵاتدا پلەی ١٧ و لەنێو زانکۆ گشتگیرەکاندا پلەی ٨ی مسۆگەر کرد، بەمەش لە پێش زانکۆ ناسراوەکانی وەک بووعەلی سینای هەمەدان، ڕازیی کرماشان و زانکۆ گەورەکانی وەک خوارەزمی و عەلامە تەباتەباییەوە جێی گرت.

شێوازی بەکارهاتوو بۆ ئەم ڕیزبەندییە، هاوشێوەی شێوازی جیهانیی QS بووە و لەسەر بنەمای ١١ پێوەر لە بوارەکانی فێرکاری، توێژینەوە و تەکنەلۆژیا، و پەیوەندییە نێودەوڵەتییەکاندا داڕێژراوە.
ئەم سەرکەوتنە بەنرخە، بەرهەمی هەوڵی بەکۆمەڵ و هاوئاهەنگیی قوتابییان، ئەندامانی دەستەی زانستی و کارمەندانی زانکۆی کوردستانە.